Мэдээллийн Reuters агентлаг саяхан Хятадын Ухань хотын шөнийн амьдрал хэвийн байдалдаа эргэн орж, залуус хамтдаа цагийг зугаатай өнгөрүүлж буй тухай мэдээлжээ.
Цар тахлын голомт болж байсан Ухань хотын амьдрал ийнхүү эргэн хэвийн байдалдаа орж, маск зүүж, хүн хоорондын зай барилгүй гадуур чөлөөтэй гарах болжээ.
Цар тахлын давалгаа ширүүсч, хэдийгээр вакцин бэлэн болсон боловч дэлхий нийтийн хүн амыг бүрэн вакцинжуулах үйл явц маш их цаг авна гэж мэргэжилтнүүд тооцоолж, дэлхийн олон улс орнуудад Covid-19 өвчинтэй тэмцэх тэмцэл дуусашгүй мэт байгаа энэ үед коронавирусын анхны голомт болсон Ухань хотын амьдрал эргэн хэвийн байдалдаа оржээ. Өдгөө тус хотод залуус юу ч болоогүй мэт үдэшлэгт оролцож, цагийг гадуур зугаатай өнгөрүүлж буй тухай Reuters агентлаг мэдээлжээ.
Бялуугаар байлдаж тоглож байсан 29 настай Жан Цин Reuters агентлагт мэдээллэхдээ, “Ухань хотод болсон тэр бүх зүйлсийн дараа гадуур гарах эрх чөлөөтэй болсон маань яг л дахин төрсөн мэт мэдрэмж төрүүлж байна” хэмээжээ.
Түүнчлэн тус агентлаг Ухань хотын гудамжаар маскгүй, тоглоомон буу, шаар бариад үдэшлэгт явж буй залуус дүүрэн буйг мэдээлжээ.
Ухань хотод 7 сарын турш хатуу хөл хорио тогтоосон бөгөөд хөл хорио дууссаны дараагаар тус хотын шөнийн амьдрал эргэн өмнөх шигээ болж сэргэжээ.
Түүнчлэн тус хотын иргэн Юи Юи хэлэхдээ, “Цар тахлын үеэр манай хот яг л оршуулгын газар мэт анир чимээгүй, хөл хөдөлгөөнгүй болсон байсан. Харин одоо бид гадуур гарч хамтдаа хооллож, зугаацах боломжтой болсон. Ийм олон хүмүүс гадуур явж байхыг би өмнө хэзээ ч харж байгаагүй” хэмээн ярьжээ.
Тус хотын шөнийн амьдралыг харуулсан дүрс бичлэгийг танд хүргэж байна:
Ухань хотод өнгөрсөн наймдугаар сард хэдэн мянган хүнийг хамарсан электрон хөгжмийн тоглолт болж байсныг мэдээлж байсан бол өнөөдөр тус хотын залуус ямар нэгэн хязгаарлалтын дэглэмгүйгээр хүссэнээ хийх боломжтой болжээ.
